PAVOOR VARTHA VISHESHAM:പാവൂര്‍ വാര്‍ത്താ വിശേഷം..സത്യതിലൂടെ....

ಒಬಾಮ ಭಾಷಣಕ್ಕೆ ಹಾಜರಾಗಲು ಎಡರಂಗ ನಿರ್ಧಾರ

ಹೊಸದಿಲ್ಲಿ: ರಾಷ್ಟ್ರ ರಾಜಧಾನಿಯಲ್ಲಿ ಸೋಮವಾರ ಸಂಸತ್ತನ್ನುದ್ದೇಶಿಸಿ ಮಾತನಾಡಲಿರುವ ಅಮೆರಿಕ ಅಧ್ಯಕ್ಷ ಬರಾಕ್ ಒಬಾಮರ ಮಾತುಗಳನ್ನು ಕೇಳಲು ಫಾರ್ವರ್ಡ್ ಬ್ಲಾಕ್‌ನ್ನು ಹೊರತು ಪಡಿಸಿ ಉಳಿದ ಎಡ ಪಕ್ಷಗಳು ನಿರ್ಧರಿಸಿವೆ.ಸಂಸತ್ತನ್ನು ಉದ್ದೇಶಿಸಿ ಮಾತನಾಡಲಿರುವ ಒಬಾಮರ ಭಾಷಣವನ್ನು ಆಲಿಸಲು ಎಡ ಪಕ್ಷಗಳು ಸಹಮತ ವ್ಯಕ್ತಪಡಿಸಿವೆ. ತಾವು ಅಮೆರಿಕದ ನೀತಿಯನ್ನು ಖಂಡಿಸುತ್ತೇವೆ.

ಆದರೆ ಒಬಾಮರ ಭಾಷಣಕ್ಕೆ ಬಹಿಷ್ಕಾರ ಹಾಕುವುದಿಲ್ಲ ಎಂದು ಸಿಪಿಐ(ಎಂ) ಪ್ರಧಾನ ಕಾರ್ಯದರ್ಶಿ ಪ್ರಕಾಶ್ ಕಾರಟ್ ಹೇಳಿದ್ದಾರೆ. ಬರಾಕ್ ಒಬಾಮ ಜಾರ್ಜ್ ಬುಷ್‌ರಂತಲ್ಲ, ಹೀಗಾಗಿ ಒಬಾಮಗೆ ಬಹಿಷ್ಕಾರ ಹಾಕುವುದಿಲ್ಲ ಎಂದು ಸಿಪಿಎಂ ಹಿಂದೆಯೇ ಘೋಷಿಸಿತ್ತು. ಆದರೆ ಫಾರ್ವರ್ಡ್ ಬ್ಲಾಕ್ ಮಾತ್ರ ಭಿನ್ನ ನಿಲುವನ್ನು ಹೊಂದಿದ್ದು, ತನ್ನ ಕಾರ್ಯಕರ್ತರು ಹೊರಗಡೆಯಿಂದ ಪ್ರತಿಭಟನೆ ನಡೆಸುತ್ತಿರುವಾಗ ತಾವು ಮಾತ್ರ ಸಂಸತ್ತಿನೊಳಗೆ ಅಮೆರಿಕ ಅಧ್ಯಕ್ಷರ ಭಾಷಣ ಕೇಳುತ್ತಿರುವುದು ಸರಿಯಾಗುವುದಿಲ್ಲ ಎಂದು ಪಕ್ಷದ ಮೂಲಗಳು ಅಭಿಪ್ರಾಯ ಪಟ್ಟಿವೆ.